Fasnacht 2022 - «Charivari»

VERSCHNUUFFER STAMM ZEEDEL 2022

Sujet: “Y G-SEE S NÜMM”

Das keibe Gschyss mit dääne G!
Das ha-n-ych langsam wirgglig gsee!
Zerscht wäge dääne G-Antenne,
denn, well De muesch zum Impfe renne.
Doch langsam wird s mir wirgglig z bunt:
Ob 5G au bi Covid kunnt?

Hesch das mit dääne G aich duss?
Bisch 2G oder 2G plus?
Syt 3G hesch muesch duurend penne?
Hesch 4G bisch e Fungg-Antenne!
Hesch Du z vyyl G no mag Dy kain,
das merggt au der 5G-Verain.

Hän d G en Yyfluss uf Dy Händy?
Bringt d Fasnacht jetz die tödlig Wändi?
Bisch boosteret oder G-nese
no darfsch mit Mundschutz in e Chaise!
Isch s Ganz am Änd Behörde gmacht?
Die teschte so gärn ihri Macht!

S herrscht Willkür und es stinggt zum Himmel
me zwingt ys zum Hygiene-Fimmel!
Y ka die keibe G nümm gsee,
die G-Form macht de Auge weh!
S git numme ai G, wo me schetzt:
s isch das, wo me mit Pünggtli setzt…

S het jeede mit däm Gschyss sy Mieh
und kasch Di däm doch nid entzieh!
S isch glyych eb längs dänggsch oder queer
am Schluss dänggt jeede: „Läng mer s Gweer!“
De machsch es mit, au wenn s Dir stinggt
obwohl Dy froggsch: „Eb s das äggscht bringt?“

S bringt Covid fiire, wie me tiggt,
und wär, wo, wie politisch liggt.
S sin Äxtra-Toure nid gärn gsee,
das duet em “Djoker” bsunders weh!
Mir sitze zämme in aim Boot,
drum wäält au Dytschland wider Rot.

De outisch Di mit Dyne G:
Bisch aifach? Dopplet oder mee?
Bisch positiv oder gar skeptisch?
Pass uff, sunscht wirdsch am Änd no septisch!
Me-n-isch sich ainig: s isch nid cool,
liggsch uf em Buuch e Schluuch im Muul!

Der IQ isch mit G verlinkt.
S isch logisch, dass es allne stinggt.
De Geegner isch s Ganz sehr suschpäggt
die weere sich drum ganz diräggt.
De Deppe lüpfts der Alu-Huet:
hän s Gfüül mir finde Lockdown guet!

Dangg Covid wird me soziophob!
Mutiersch dur d Impfig äggscht zum Schwoob?
Hesch noo der Impfig no e Wille?
Ka me Di druff per Knopfdrugg kille?
D Verschwöörer sin im Paradies
und machen aim gärn s Lääbe mies!

Dur d Covid App wirdsch duurend träggt.
Bisch suuber, oder bisch verdräggt?
Das ka aim d App grad sofort saage,
die gseet: duesch dusche oder baade!
Die mäldet, wo me-n-aane goot,
und wäggslet denn vo Grien zue Rot!

Zem Aaloss kenne kontrolliere
duet me der Zuegang limitiere.
Wenn D wottsch derby syy, mäldsch Di aa
und machsch an Arm e Bändel dra!
Und plötzlig schluggsch und dänggsch: Aha!
Das het me z Dytschland au scho gha…

S git Fasnacht – das isch wunderbaar!
S sin d Reegle uns zwar nid ganz klar:
De muesch für d Fasnacht z Basel syy
und grieggsch vo 1 bis 5 kai Wyy.
Es isch ys glyych, was denn no goot.
Wenn s nuur am Määntig Vieri schloot!

Verschnuuffer 2022