Fasnacht 2017 - «Bim Teutates! D Wält d spinnt»

Zeedel 2017 (als PDF)

VERSCHNUUFFER STAMM ZEEDEL 2017

Sujet: "Bim Teutates! D Wält d spinnt"

Die ganz Schwyz isch vo Schwyzer bsetzt!
Was luegsch uf aimool so entsetzt?
- Die ganz Schwyz? - Nai, natyyrlig nid,
weil s - Zeus sei Dangg - no Basler git!

Vo Downtown Basel bis no Rieche
sin mir doch alles gaili Sieche!
Mir sin e wirgglig glatte Huffe,
wo sehr gärn rauche, frässe, suffe!

S isch ai Idylle und ai Friide
und ändloos Gligg isch ys beschiide.
Die rooti Eva isch ys hold,
drum fäält s ys nie an Strytt und Gold.

O Basilea nostra sancta,
Du bisch dä Hort, wo-n-ych druf blangt ha!
Wenn s Di nid gäbt, do an mym Rhy,
no liesst ych s Lääbe grad lo syy!

Doch - bim Teutates - gseen ych rächt?
Y glaub mir wird voor Schregg grad schlächt!
Was um das Basel umme goot,
isch pyynlig, fräch! Me wird grad root!

S het s Baselbiet -dert foot s scho aa -
kai Aanig vo Pecunia.
E groosse Latz und nyt derhinder,
drum wirsch dert aapumpt umso gschwinder!

Au d Räscht-Schwyz isch nid ganz im Lot
s haisst BILLAG, MEI dert s tääglig Brot.
D Armee bringt s fertig ganz ellai
stellt sich uf d Fiess e Hinkelstai!

Der Globus um ys spiilt verruggd
s wird d Ratio aifach unterdruggd!
Denn selig sin die geischtlig Arme,
drum hän mir mit ys sälbscht Verbarme!

O mächtige Teutates, hilf!
Denn ooni Di steen mir im Schilf!
Die spinne, wo no z Basel woone
und linggi Randalierer schoone!
Die spinne, wo mit ihrem Kaare
in d lnnerstadt wänn yynefaare!
Die spinne, wo am Rotliecht halte
und wo no brämse fir die Alte!
Die spinne, wo dien d Kinder pushe,
und voor em Christoph Blocher kusche!
Die spinne, wo Zalando nutze
und s Gäld im Schwoobeland verputze!
Die spinne, wo der Trump dien wääle -
au die, wo d Clinton klar empfääle!
Die spinne, wo mit ... ähm mit ...
saag mir doch aimool kurz, y bitt:
Wär spinnt uf däre Wält eich nid?
E species rara, wo s no git?

OBelenus, so hilf ys doch,
befrey ys vo däm Spinner-Joch!
D Cäsare, wo mir hit so gseen
sin alli schwär oligophren!

Der Putin ka zwar nid guet tanze
zaigt ys derfir sy blutte Ranze!
D Frau Merkel findet Flüchtling toll,
ihr Boot goot under und lauft voll.
Der Heliande, dä het s langsam gsee,
sait: Lägget mir am Elysee!
Und s Luschtige am Berlusconi
isch, dass me merggt, es goot au ooni!
Dass me regiert wird, vo so Kälber
drait jeede d Schuld e weeni sälber!

Mir leese z Basel das Probleem
mit em Donald'sche Theorem
und baue um s Refugium
e ganze hoochi Muure drum.

,,O salve, wärti Civitas!
Erhebet s Poculum (dasch s Glas)
und stoosset mit ys zämmen aa, 
dass ys die Räschtwält gryzwyys kaa!"

Verschnuuffer 2017