VERSCHNUUFFER STAMM ZEEDEL 2024

Sujet: “E jeedem Dierli sy Pläsierli”

E jeedem Dierli sy Pläsierli:
Fir Di e Milch, fir mi e Bierli.
E jeedes griegt, das wo-n-em gheert,
so lang, wie s niemert anders steert.

S sin interessierti Zoologe
vo ganz wyt här do aane gflooge
zem unser Urvolgg go studiere,
schyynts dät der Gen Pool nid mutiere.

Die Schwyzerischy Viech-Partey
y waiss, jetzt git s e Riisegschrey – 
het bsunders vyyl ganz rari Arte
uf d Gen-Entwigglig muesch lang warte...

Das fiehrt zue bsunders raare Rasse,
wo mir do kurz in Wort wänn fasse.
S git au globaali Zuchtversiech,
wo me im Noochhinein nümm miech.

So het me Hünd verschiide krützt
nuur leider het das nid vyyl gnützt:
E glatti Grytzig isch der Trump
e Sauhund syg är und e Lump!

Es isch der Scholz für d Jagd nüt wärt,
als Schoosshund het är sich bewährt.
Der Kampfhund Putin ghört in Zwinger
sunscht bysst är aim z letscht no in Finger!

Mit Veegel het me s au probiert, 
so schyynt me ehnder no versiert.
S sin d Resultat nid ganz so gfäärlig –
und doch ganz glatt, so sin mir ehrlig:

Dä Doppeladler isch zem Schiesse
das het är gar oft heere miesse,
au sälber macht är Harakiri,
s sin d Gen von Xhaka und Shaqiri.

NId nuur bin Coiffeur wird är zupft
s verruggti Johnson-Huen wird grupft!
S ney Lieblingsässe vo de Kings
so heert me, syge Boris-Wings.

Der Schnaabel gross, vyyl z glai dr Kopf,
und z weenig Saft im Honig-Topf.
Me nimmt globaal ihn an de Eier,
der Benko wird zum Pleitegeier.

Dr Markus Somm duet das gärn brichte,
als Zyzzigsänte ka-n-är dichte.
Em Schluggspächt Karli isch es wool,
am liebschte het är ain im Gool!

Die räschtlig Fauana het vyyl z biete
zem Gligg sin dsa nid numme Niete:
Der Beat Jans, är zieht no Bärn,
dert het me Kusch(el)tierli gärn.

Ä darf dert s schwarze Schoof beerbe,
wo mit der Nid-Wahl, däre herbe,
em Buntspächt Herzog gar nid nätt
ganz zünftig ains ans Bai ginggt het.

Der Tanzbär Berset sait "Goodbye"
z Europa wär är gärn dehei.
Es übernimmt der täglig Ton,
der Macron als Chamäleon.

Hersch sy uf Änglisch, fliesst der Schweiss:
d Martullo unseri Meckergeiss.
Der Darwin Charly het schyynt s gschloofe
sunscht gäb s nid so vyyl Blocher-Goofe!

Der Luschtmolch Andrew duet sich winde
är isch in dunggle Höhle z finde...!
Die blindi US-Schlyyche Joe,
die macht aim nüt – do bin y froh!

S isch d Naschkatz -minu fescht am Schnuurre
ganz warm wirds aim so naimeduure.
S zieht d Schildkrott Baschi zrugg ins Huus
und luegt nuur zue de Löcher uus.

Die Vyylfalt isch e riise Schatz
au bsunders rari Gen hän Platz.
S isch d Fasnacht do e groosse Pool,
wo alles gmixt wird – das isch cool!

Verschnuuffer 2024