VERSCHNUUFFER STAMM ZEEDEL 2023

Sujet: “S‘isch kai Zuggerschlägge!”

Kai schlaui Gaiss schläggt das ewägg:
s isch s Doosyy graad kai Zuggerschlägg!
Dangg Zugger ka me s trotzdäm gniesse,
muesch s allefalls bim Zahnarzt biesse.

Zer Zyt git s weenig Gfraits zem Brichte,
s vermeere sich nur d Horrorgschichte.
S stoot d Stimmig allgemein uf Rot,
die ganzi Wält isch uss em Lot!

Das finde mir zem Dail ganz glatt:
Der Trump setzt sich konstant Schach – Matt,
und au der Biden isch nid schlauer:
är syg „Top Secret“ – Akte Klauer!

D Erggläärig, die loot uf sich warte:
Der Presidänt syg no im Garte,
är gniess dert Tee und ai Schlugg Rum,
derzue e Schachtle „Ibidum“.

Der Putin liebts ys voll z brüskiere
und duet bim Noochber yymarschiere.
Spezialaggzioon, so haisst dä „War“
- är fiehrt sich uff ganz wie-n-e Zar!

S wott niemerts rächt Kritik probiere
und denn im Winter miesse friehre.
Denn s russisch Gas wird dringend bruucht,
drum wird är finanziell nid gschluucht. 

Scho styggt bi mir dä schregglig Gluscht
no Siessem geege Psycho-Fruscht.
Do muess – kasch s äggscht scho ahne? –
e Kalorie-Bombe aane!

Die liebi Queen git ihr: „Farewell!“
Zem Harry sait me: „Go to hell!”
Luegsch hinter die royal Kulisse,
no findsch die Kings dert rächt besch…aide. 

Und au der woori King sait: „Ciao!
Y blyb dehai bi Kind und Frau.“
Jetzt sait der Djokovic wie s lauft
– y ha my Färnseh grad verkauft. 

Y ha d Enttüschig schlugge miesse,
so ka-n-ys Tennis nimme gniesse!
Vo so vyyl Druur wird mir halb schlächt:
E Plumpudding kunnt mir graad rächt.

S isch d Schutti-WM z Qatar glatt,
nur findet sy uf Friidhöf statt.
S mien d Schwoobe no drey Spiil grad hai,
denn bricht der Neuer sich no s Bai!

Drey scheeni Uffdritt het au d Schwiz,
bim Vierte schämmt me sich e Bitz…
D Franzoose träffe nid uf s Gool,
drum wird s em Messi schaurig wool!

Zem Schlägge passt do suur und siess
e Combo, wo-n-y schampar gniess,
y läng grad in my Schläggsagg dryy,
es muess e suuri Zunge syy!

Do gspyyrsch im Muul e richtig Gwitter
nimmsch z vyyl dervo, no wird s ganz bitter.
Es blybt der Gschmagg vo Matsch und Glaischter:
der FCZ isch Schwizer Maischter! 

Fir s Klima gläbbt me sich uf d Strooss
no isch dert kurz der Teyfel loos.
S sin alli danggbar und auf froh –
glaubsch Du im Ärnscht, das syg eso?

Fir s Klima sin die Liim e Saich,
drum sin die Yysetz biirewaich.
Doch: nimmsch zem Glääbe Carambar
no bisch bim Umwältschutz e Star!

S isch d Fasnacht siess und wool dosiert,
en Überdosis nie bassiert.
Doch macht si süchtig, das isch woor,
drum bruuche mir si Joor fir Joor.

Zum Schluss nimm y e Fasnachtskiechli
und mach em Cortège no-n- e Bsiechli.
Bevoor y gang butz y no d Zeen,
saag: “Aadie zämme, gniessets scheen!“

Verschnuuffer 2023